اسم الكاتب: Sherry Argov
اسم الكتاب :Why Men Love Bitches: From Doormat to Dreamgirl - A Woman's Guide to Holding Her Own in a Relationship
✯✯✯✯☆
للتحميل
On Goodreads
الكتاب دا بيـ relate لعلاقات كتيرة في حياتنا
تقريبـًا وأنا بقرأ كل شوية أقول : ايه دا! دا بالظبط زي ما فلانة عملت!
ايه دا! دا بالظبط زي ما علانة قالت!
بس بصراحة الكتاب ينفع أكتر للناس اللي هي لسه في مرحلة التعارف والـdating
يعني لو واحدة مرتبطة من فترة طويلة ممكن ما تعرفش تطبق كل اللي فيه بس برضو فيه نصايح مهمة جدًا للحفاظ على شكل العلاقة متوازن خاصة لو هي مع شخص مش متفهم أو حاسة إنها ضحية في العلاقة أو إنها نكدية وهو مكبر دماغه
الكتاب يعيد تعريف كلمة Bitch اللي معناها هنا مش "عاهرة" بل معناه السيدة الواثقة من نفسها المستقلة التي تضع راحتها أولًا وتضع نفسها في المقام الأول
يعني باختصار بيقول للبنت المصرية : ماتضحيش عشان حد يختي..محدش يستاهل تتعبي عشانه غير نفسك! والرجالة بتحب كدا سيبك انتي من جو مراهقين الفيسبوك بتاع أنا بحب البنت اللي شعرها طويل وعينيها خضرا وقصيرة عشان أقدر أحتويها
ورفيعة عشان أشيلها يوم فرحها وfake ونحنوحة وووووإلخ
SURPRISE!
الرجالة ما بتحبش كدا..تؤ تؤ تؤ تؤ
عمرك سألتي نفسك إزاي الواد الجامد (جدن بالنون) اللي انتي لا مؤاخذة -بتريّلي عليه- انتي والشلة بتاعتك مرتبط بالبنت اللي انتي شايفاها عادية ومفيهاش علامات جمال ومش سيكسي فشخ زيك؟!
عمرك سألتي نفسك ازاي رغم إن جسمك حلو وشعرك موزبليه وبتلبسي قصير ومحزق وبتصاحبي كتير ومع ذلك مفيش علاقة ليكي بتكمل؟!
الكاتبة هنا بتجاوب على كل تساؤلاتك بكلمة واحدة ...خلي عندك كراااااااامة..كغااااامة...كاف راء ألف ميم تاء مربوطة!
ما تبينيش للراجل إنك هتموتي عليه..ماتطبخيش طبخة واو وانتوا لسه عارفين بعض من أسبوع (أنا بقولك صحابك أولى بالطبخة دي)..مش لازم تلبسي ضيق وجسمك يبان عشان الشوباب يعجب بيكي (هما هيموتوا على جسمك مش عليكِ كانسانة بس ولما ياخدوا غرضهم -اللي هو جسمك- هيرموكِ ولا أجدعها شلة مغتصبين ودي مش علاقة انتي عاوزاها دا اغتصاب باسم الارتشباط والحب)..ماتضحيش بمستقبلك وبشغلك وبصحابك عشانه وما تجيش عليهم عشانه -برضو-!... ماتقرفيهوش اتصالات..مش لازم تردي عليه كل مرة يتصل (خليه حايح شوية وهيتجنن انتي فين)..خليكِ مستقلة ماديـًا حتى بعد الزواج ولو كان غني جدًا -برضو-!
وحاجات تانية كتيييييرة بتصب في مصلحتك انتي يا أوختشي والله..!
الكتاب هيقولك ازاي تاخدي حقك بأدب وشياكة من غير خناق وزعيق لما يضايقك..يتجاهل مطالبك..يعمل حاجة مش حباها..وطبعًا إزاي تتعاملي مع الغيرة -الحته دي بالذات هتخليكي تقري الكتاب-
نصيحة يعني،اقفلي صفحة الفيسبوك واعملي بلوك لصفحات النحنحة وفوقي للكتاب دا شوية واقريه..وانتي هترجعي تبصي للهبل بتاع المراهقين دا باحتقار وتبدأي فعلاً تدوري على الراجل اللي بجد..الراجل الحقيقي..مش شوية العيال اللي هرموناتهم طافحة على كلامهم وتصرفاتهم دول!
ملاحظة/ هتلاقي واحد أهبل بيقولك الرجالة في الشرق مختلفين وإن مش كلهم زي بعض..دا باللي في رجلك وعلى دماغه عشان دا بالذات هتلاقي الكتاب متكلم عنه وسط السطور وهتكتشفي إنه مش الراجل اللي انتي عاوزة تعرفيه!
ملحوظة رقم 2 / الكتاب الانجليزي لغته سهلة..لو بتتفرجي على أفلام أمريكاني هتفهميه بسهولة
ليست هناك تعليقات:
إرسال تعليق